منتديات وادي شعير

منتديات وادي شعير (https://wadishaeer.alrakoba.net/index.php)
-   منتدى السياسة والفكر والأدب (https://wadishaeer.alrakoba.net/forumdisplay.php?f=8)
-   -   من الواتساب: أقوال منسوبة للشيخ العبيد ود بَدُر {ود ريَّا} : (https://wadishaeer.alrakoba.net/showthread.php?t=3479)

عمر محمد الأمين 01-24-2020 08:16 PM

من الواتساب: أقوال منسوبة للشيخ العبيد ود بَدُر {ود ريَّا} :
 
أقوال منسوبة للشيخ العبيد ود بَدُر {ود ريَّا} :
https://3.bp.blogspot.com/-4InnANpuq...0/Picture9.jpg
الطيب الجد
خليفة ودبدر يدعو للحضور وللإسلام والمسلمين...


1) بعد ما أفْنِي العِمِير، وادخل القِبِير، إن جاكم مني خِبير، اعرضوه علي شريعة الخير، إن قبلتو قلتو وإن لا فلا.
2) الماعون الليِّن غسيلو هيِّن.
3) كان ما عجيني منو البجيني.
4) من لزم الرقاد عدم المراد.
5) السكين من السَّلِب، والعصا من الكلب، وفَكَّة الرِّيق مسمار قلب، والبيابا الصلح لا بد ينغلب.
6) الداير الرياسة يكونن عندو خمسة :
• وَشُّو فيهو قهر،
• وبحمل السهر،
• وعندو ضهر،
• وعندو خُلُق،
• وإيدو طُلُق.
7) القال أنا ودقِّ سدرو، شيطانو قدرو.
8) تلاتة أخير منهم تلاتة وأعوذ بالله من التلاتة :
o مالاً لا يوفِّي فرضك، ولا يستر عرضك، أخير منو الفقر، وأعوذ بالله من الفقر.
o مَرَا كان غِبْت خانتك، وكان حضرت هانتك، أخير منها العزوبية وأعوذ بالله من العزوبية.
o ولداً لا يحيي دارك، ولا يوقد نارك، أخير منو العقر وأعوذ بالله من العقر.
9) القادر ما تقادروا، والشر ما تبادرو، والإضِينة ما تهاظرو، وما تشهد على الْمَاك حاضرو.
10) أدِّي اللقيمة، وحِل الصِّرِيمة، وعدِّي الكِليمة، وآخر الليل أُخُد لكْ قِويمة، وشوف كان ما تبقي من أهل النَّهِيمة.
11) نعم الأمير إن زار الفقير، وبئس الفقير إن زار الأمير.
12) العندو حبة من الرئاسة ما تكمل معاهو الفراسة.
13) الما عندو ضهر، وما بِحَمَل السَّهَر، ووشُّو ما فيهو قَهَر، هو اللِّجِزْ ومرتو التَّهِز.
14) توضا صحيح، صلي صحيح، وإن سألوك قول قولاً نصيح، ومد إيدك لا تكون شحيح، شوف دنيا وآخرة كان ما تستريح.
15) عليك بالصبي الما بشيب {القرآن}، والقمر الما بغيب {الكرم}، والظن الما بخيب {صلاة الجماعة}.
16) النساء فيهن مرا، وفيهن نص مرا، وفيهن لا مرا، المرا من عتبتا ولا ورا، ونص المرا لي جارتا وبي الضرا، ولا مرا ناس السوق جايبين خبرا.
17) قود من يتبع، كلِّم من يسمع، واكِّل من يشبع.
18) عليكم بملازمة أورادكم، وتقوى الله اجعلوها زادكم، تبلغوا مرادكم.
19) علامات الشقاوة: عيناً حارَّة، وروحاً كارَّة، وإيداً صارَّة.
20) الما بفهم بالتلاويح؛ لا بريِّح لا بستريح.
21) الضيف أكِّلو لمَّن يقول بَس،ْ وطَلِّع ليهو المِنْدَس، وونِّسو لمَّن ينعس.
22) جاءته مجموعة النساء قالن ليهو أدِّينا الطريق؛ قال ليهن: انتن النسوان طريقكن حِسَّاً ضابِل، ومُقْنعاً سابِل، ووشَّاً للرجال ما بقابل، الطاعة، وحِفظ البُضاعة، السكوت، ولزوم البيوت.
23) وسئل عن عِيَن المطر فقال: إن جانا نازل شِنْ لينا بالمنازل، وإن جانا صَابْ شن لينا بالحساب.
24) كل شدرة نابتة، تِحِتَا حكمة ثابتة.
25) الما عندو محبة ما عندو الحَبَّة والعندو محبة ما خلَّا الحبة.
26) الصلاة بدِّر وكِتَّا، والأرض كتِّر حَرِتَّا، والزكاة عَدِّما الحِتَّة، شوف اكان ما تبقى من الرجال اِتَّ.
27) القال أنا، شيطانوا دنا.
28) وسئل عن الزراعة فقال: لا تمرقها من بالك، ولا تسويها راس مالك.
29) العِنْد السِّيد أقرب من الفي الإيد.
30) في الصيف كتر طشيشك، وفي الخريف كتر حشيشك، إن خِتِيت لقمة دَرِيشك الدناءة ما بتعِيشك.
31) البِتْوضا يصلي الفَجُر، وعلى جارو يلزم الصبر، ولله يفوض الأمُر، إن جاهو شِي اليقول من ود بدر.
32) التاجر يتم ميزانو، ويحلِّي لسانو، شوف اكان ما اتملا دكانو.


الساعة الآن 01:36 PM بتوقيت مسقط

Powered by vBulletin® Version 3.8.11
Copyright ©2000 - 2024, vBulletin Solutions Inc.

a.d - i.s.s.w