[زهاوي عبد الجليل الامام]

بركة الشيخ
هاشم صديق

(رجل وزوجته.. يتناولان وجبة العشاء..وجهاز التلفزيون أمامهما وهو يصدر ضجيجاً وهو يعرض ويبث برنامجاً عن الإنتخابات)
الزوجة : إنت ياعادل صحي دايرتنا دي.. المؤتمر الوطني جابها كلها.. مية في المية؟؟
الزوج : أيوه
الزوجة : ولا زول واحد أدى الشعبي.. ولا الإتحادي الديمقراطي الفصل.؟
الزوج : إسمو الإتحادي الديمقراطي الأصل.. مش الفصل.
الزوجة : ما يا هو حزب ناس سيدي..يلحقني ويفزعني الجدو النبي.. قلت ليك..صحي المؤتمر الوطني جابها مية في المية
الزوج : قالوا كدا.. مية في المية
الزوجة : ( محتجة) أجي يا بنات أمي . بس كيفن يعني ولا واحد في الدايرة دي ما دايرهم؟!.. هسه إنت ده ياعادل مش أديت صوتك للتحالف.. أها .. كيف يعني تبقى مية في المية
الزوج : ( مرتبكا).. لكن .. لكن أنا ما أديت التحالف
الزوجة : أديت منو؟
الزوج : الشجرة
الزوجة : (تضرب بيدها على صدرها وهي تصرخ) سجمي .. سجمي ياعادل.. بعد الصالح العام.. والإعتقالات.. و....
الزوج : أعمل شنو يا آسيا..ماسك القلم.. القلم طار من يدي.. عمل صاح للشجرة ورجع ركّ في إيدي تاني..
الزوجة : ( فزعة): سجمي.. شعرة جلدي ..كلّبت.. يلحقني ويفزعني.
الزوج : أبو هاشم
الزوجة : لا..البشير
الزوج: ( وكأنه يجد الفرصة ليسألها) أها ااا .. وإنتي ذاتك مش أديتي حاتم السر.. أها ااا ..تبقى كيف النتيجة مية في الم ي ي ي ية ؟!
الزوجة : أ..أنا ..أنا ما أديت حاتم
الزوج : أديتي منو؟!
الزوجة : الشجرة
الزوج : ( يصرخ في وجهها) أديتي الشجرة يا آسيا..بعد الصالح العام الأحالوني ليه..والإعتقالات.. وعذاب العيشة..و..
الزوجة : أعمل شنو ياعادل.. من ما مسكت القلم.. أسمع ليك صوت يوسوس لي في أضاني..أدي الشجرة يا آسيا.. عليك بالشجرة يا أسوووية...
الزوج ( محتارا) : شيء عجيب الحصل لينا دا
الزوجة : غايتو اليوم داك.. كان يوم غريب.. تخيل يا عادل.. كلتوم جارتنا.. مرقت من بيتها ماشة أمبدة.. حلفت قالت ركبت مواصلات السوق الشعبي.. ما لقت روحها إلا راكبة مواصلات الشجرة
الزوج : ( يهز رأسه في حيرة) يا ربي فيهم شيء لله الناس ديل؟! ( يسرح قليلاً) صحي هم مما جو يكوركو هي لله..هي لله
الزوجة : لا للسلطة ولا للجاه (وكأنها تهتف)
الزوج : لكن كمان الجاه والسلطة اللقوها الناس ديل.. فرعون وقارون لقوها ؟
الزوجة: (تلتفت لصينية العشاء أمامهما) هي كدي.. خليك... منهم أُكل..أُكل.. الأكل برد.
الزوج : (يضحك) كل يوم فول
الزوجة : الليلة معاهو بيض مسلوق( تصمت للحظات وهي تنظر للصينية بتركيز ثم تنتابها حالة من الرعب) : عادل
الزوج : شنو؟
الزوجة : عاين للبيضة دي ( تمسك بالبيضة وترفعها أمام عينه بيد راجفة) شوف.. شوف فيها شنو؟
الزوج: (يمعن النظر) ما.. شايف حاجة
الزوجة : أجي ياعادل.. عاين كويس.. البيضة دي.. مش مرسوم فيها شجرة؟
الزوج : ( يمعن النظر أكثر) تقصدي الحاجة دي؟!!
الزوجة : آآي
الزوج : ( ينفجر ضاحكاً) دي مش جرجيرة إتلصقت في البيضة؟!..إنتي تتفلسفي فارشة الجرجير فوق للبيض.. تقولي لي شجرة مرسومة في البيضة؟!
الزوجة : سجمي..سجمي.. الناس ديل وهمونا.... لما بقينا نشوف الشجرة في سقف الاوضة؟!.

[الجيلي المامون]

:):):):):
والله ربنا يسترنا ويستر السودان من كثرة الاشجار

[زهاوي عبد الجليل الامام]

تزرع بذرة تنبت شجرة....
يا الجيلي أوعك تقطع صفقة شجرة.
مشكور على المرور من هنا يا رايع!!
دمت بود