المساعد الشخصي الرقمي

مشاهدة النسخة كاملة : طق حنك !!


زهاوي عبد الجليل الامام
08-08-2010, 07:55 AM
هذه الأيام إذا رصدنا حالة الطقس العامة للنساء نجدهن يعانين من إرتفاع
في نسبة التمثيل والمشاركة الخارجية مع إنخفاض أو إنعدام في الإهتمام
بشئون البيت الداخلية.يعني هذه الأيام تصحى من النوم وما تلقى ((أمك ,زوجتك ,
أختك أو الممثل الدائم في البرتكولات الخارجية)) في البيت لماذا؟
لأنها مطلوبة كم جردل من صويحباتها وجاراتها ومفروض عليها التسديد الآني
يعني ما في تأجيل.طبعاً طقوس مهرجان الأبري شابها بعض التطور المتمثل في
تجهيز وجبة فطور مدنكلة من صاحبة العواسة لصويحباتها ويعتبر طقس الفطور
مساحة للتباهي والتفاخر بين أفراد المجموعة لأنه الشغلة بقت مجموعات
يعني الواحدة مشتركة في مجموعتها إشتراك حصري لا يقبل الإنفكاك لأنه ما في فك تسجيلات وكدة.
هذه المساحة لطق الحنك في المواضيع الإجتماعية!!
دمتم بود

زهاوي عبد الجليل الامام
08-14-2010, 11:07 AM
السلام عليكم ورحمة الله وبركاته
بمناسبة رمضان وين بورداب الداخل وداخل الداخل(يعني الجوة الحلة)
مختفين؟؟سألنا عنهم فعرفنا السبب وعذرنا إنقطاعهم لأنه قالوا الكهرباء
عاملة عمائل فيهم شغالة تكنتك ساكت يعني النوم شحاتيف لذلك تلقى
الواحد شايل أخلاقه في طرف نخرتو كلمتين تلاتة الغلاط يقع والنقة تطول!!
الله يأذي الكان السبب!!
لذلك نتمنى أن ينتحل بورداب الداخل الصفة الخفاشية ليعاودوا الظهور ليلاً!!
دمتم بود

الجيلي المامون
08-14-2010, 05:59 PM
الزهاوى سلام وتحيات
والله مافى بلد عندو طقوس وعادات لى رمضان زىنا فى البلد وخاصة نحنا ناس الوادى
انت عوست لى جردل وما عست لى جردل وابريك حلو وابريك مر وطاعم ومسيخ
بس ياعمك انت شكلك كده عصروك فى حق الابرى( رسل الريالات ياعمك وبطل الجرسة)

زهاوي عبد الجليل الامام
08-14-2010, 07:05 PM
الزهاوى سلام وتحيات
والله مافى بلد عندو طقوس وعادات لى رمضان زىنا فى البلد وخاصة نحنا ناس الوادى
انت عوست لى جردل وما عست لى جردل وابريك حلو وابريك مر وطاعم ومسيخ
بس ياعمك انت شكلك كده عصروك فى حق الابرى( رسل الريالات ياعمك وبطل الجرسة)
الحبيب الجيلي سلام
فعلاً عادات وطقوس رمضان في السودان مميزة
وذات نكهة خاصة حتى السخانة والجرسة مميزة!!
يا الحبيب صدق رسلنا حق الأبري ولليلة ما جابوه لينا!!
تسلم يا غالي علي طق الحنك الجميل!!

زهاوي عبد الجليل الامام
08-16-2010, 07:04 PM
شهر رمضان من الشهور الكريمة لأن كل مسلم يتطلع ويتلهف ويدعو ربه لبلوغ
هذا الشهر الكريم ويكمل فريضة الصوم على أكمل وجه لكي يفوز ويجني ثمار الصوم
المتمثلة في الرحمة والمغفرة والعتق من النيران.
لذلك تجد الكل يتلهف ويحن لقضاء هذا الشهر الكريم وسط الأهل والأحباب لكي يستمتع
بالطقوس الرمضانية المميزة مثل حلقات الذكر عقب صلوات الظهر والعصر وتناول الإفطار
في شكل جماعات في الساحات والمساجد وصلاة التراويح ,لكن يتوجب على من يبحث
عن هذه الطقوس والمتعة أن يدفع ضريبة(الشحتفة) بالنهار وذلك لعدم إستقرار التيار الكهربائي أو بالأصح عدمه عديل كدة.
بالمناسبة خلونا نطُق الحنك شوية كدي إنتو مسعولين من الخير سيادة البروف
والي ولايتنا لمن جانا يعزينا في الشهيد (سلامة الله يرحمه) ما وقف علي الحال بنفسه
وشاف البهدلة بأم عينه ووعدنا بحل المشكلة حل جزري وأعلن تبرعه بمحول كهربائي
يحمل إسم الشهيد (الظاهركلامه طلع بندق في بحر,أو كذبة من كذبات أبريل التي ضحكوا بها
على أهلنا الطيبين ومكنتهم من التشبث بكرسي السلطة)
والله دي ما كانت المحريا فيك يا سيادة الوالي ويا الرفاعي تضحك علي أهلك وأبناء عشيرتك,
لكن أصلو ما عافين ليك شحتفة أهلنا في رمضان إصوموا بلا كهرباء ويحللوا صيامهم بالموية الحارة أو إشتروا الثلج.

زهاوي عبد الجليل الامام
08-23-2010, 11:01 AM
رمضان كريم...تصوموا وتفطروا على خير.
من الملاحظ في السنوات الاخيرة إنتشار ظاهرة
الفنانين الشباب يعني قربنا نبقى ذي لبنان ومصر
(نسأل الله العافية والسلامة),ومن المؤسف أن تتم
إستضافة هؤلاء الإنصرافين في قنواتنا الفضائية ليدافعوا
عن فكرة تغنيهم بالغناء الهابط.قبل كم يوم شاهدت سهرة
على قناة هارموني قدمتها المذيعة هدى عمر وإستضافت
الصحفي الفني طارق شريف ومجموعة من مروجي الغناء الهابط
منهم الشاعر الخاوي أيمن بشير ومغنواتية الهبوط والإنحضاض:نزار المهندس
وسامي عز الدين وقرقور وأحمد البنا ,إستمرت السهرة لساعات لمسنا الطرح
والنقد الموضوعي من قبل الصحفي طارق شريف لتجربة هؤلاء الصعاليك الفنية
وبالمقابل تابعنا ردة فعلهم تجاه هذا النقد الهادف بتمسكهم ودفاعهم المستميت
عن فكرة الغناء الهابط وتبريرهم لذلك بأن الزمن زمن سرعة والكل يحتاج لإيقاع سريع.
نسأل الله أن يعجل بأجالكم يا صعاليك....الغريبة حملت السهرة أغرب عنوان:
ذوق جيل من المفترض أن تكون تحت عنوان خاذوق جيل!!
رأيكم شنو؟؟؟؟
تصوموا وتفطروا على خير

الاء ابراهيم
08-25-2010, 09:33 AM
السلام عليكم كيف الحال ورمضان الغربة واياك

،بالنسبة لموضوع الفنانين الماعندهم شغلة يعملوها ديل انا عندي القنوات ذاتها ما ليها لازمه و دا في حد زاتو موضوع ،اما عن الفنانين عندهم فهم غريب في راسهم كمان داخلين الاستديو بي حنك انو كل جيل عندو غني خاص بيه لو دا الخاص بينا الله يكون في العون ونقول الله يرحم اغاني زماااااااااااااان،والحاجه المحيره انو الاجيال الجايه ح تقول شنو !!!!!!!!!!

زهاوي عبد الجليل الامام
08-28-2010, 01:41 PM
الأخت ألاء سلام
المشكلة في قنواتنا الفاضية أقصد الفضائية
التي تتيح لهؤلاء الصعاليك فرصة الظهور على
شاشاتها لتُعكر mood المشاهد الكريم.في الحقيقة
ظاهرة الفنانين الهابطين أصبحت مشكلة حقيقية تخصم
الكثير من ذوق المستمع وتؤثر بشكل خطير على ملامح
الجيل الحاضر من ناحية ثقافية وفنية!!
شكراً حثيثاً ألاء على إثراء النقاش وطق الحنك!!
دمتِ بود

زهاوي عبد الجليل الامام
09-06-2010, 12:06 PM
كل عام والجميع بخير ونسأل الله العظيم أن يتقبل
منا ومنكم صالح الأعمال!!
عاوزين نـ طق الحنك شوية في وضع المنتدى والناس
الكابا الزوغة ويظهروا ذي هلال رمضان يعني يادوب الواحد
يدخل....يقرأ ويطلع دون أن يشارك الأخرين بالرد على مواضيعهم
ومشاركاتهم سوى كانت ردود للشكر أو ردود نقدية.إننا نحتاج أن نشكر
بعضنا البعض لأن من لا يشكر الناس لا يشكر الله!!!
ملاحظة ثانية هي الترحيب بالأعضاء الجدد غير مشرِف وهذه واحدة من
العقبات التي تحول دون تطور المنتدى لأننا عندما نرحب بالعضو الجديد نرفع من معنوياته ونساعده
على كسر الحواجز والمتاريس!!
نرجو من الجميع أن يشاركوا في بوستات العزاء لأداء واجب العزاء لأهل المتوفي
والترحم على الميت بالدعاء له لأن الميت في أشد حاجة إلى الدعاء.
ملاحظة أخيرة هي وصول عضوية المنتدى إلى الرقم 75 والأعضاء النشيطين
34 عضو . السؤال أين النصف الثاني من الأعضاء؟؟؟؟؟؟؟
هكذا منتدى لا يُشرفنا جميعاً
دمتم بود