[الشفيع محمد علي]

في اعتقادي أن الطيب ود ضحوية أشهر شعراء الهنبتة هو من أفضل شعراء الشعر الشعبي السوداني على الإطلاق حتى وإن طغت سيرته في مجال الهنبتة على سيرته كشاعر.
ويقول في الفخر:

ماني التَّنبل القاعد براعي الضان
وختّاراً ببيت فوق قُجة أُم كيعان
صبّاراً على قدر الإله إن كان
أنا أبو فاطنة في اليوم السيوفو سنان

كما قال:
أنا ماني التنبل الفي البيت صِنٍعتي حليبْ
بَدور الشًّدّة فوق إبلاً شوافي ونيب
إن حرًّت نخت الشكرة ما بنعيب
وإن بردت نكافيبهن سوالف أم طيب

وقال أيضا:
الليل حيلو روح وحس سروجنا يبنِّنْ
جدع النمّة ود أب زيد وصوتو يحنِّن
نحن الكُسًّر النظرة عيوننا تجنن
ديمة درقنا بي دم الرجال متحنن

وقال في الفخر أيضا:

كم شديت على تيساً بسوك الناب
وكم جايب زَمَل من الرَّهد كَسّاب
حديث الناس كتير .. ما عندي ليهو حساب
إنقطَع اللسان يا فاطنة أبوك إن عاب

كم شدّيت علي تيساً بهمك الغَلة
وكم غوَّص بهن لامن شِهيرن حلَّ
ود مكّة بيقول يا خالي كيف الحّلَة
من سوقهن حلف بلّال جنى خادم الله

كم شديت علي ضهر البِهمْك الشوكْ
وكم كرَّف قُروناً عَبَّكِن دايوك
أمانةَ يا حسن تاخد عشا الولدوك
ياتو الخَلَّسك وكت العساكر جوك؟

[زهاوي عبد الجليل الامام]

الهمباتة لفظ يُطلق على من ينهبون ويسلبون الإبل.
كأنما الهمباتي في حياة البادية السودانية أرفع درجة
عن الحرامي والصعلوك.
ومن أشهر الهمباتة في ذلك الزمان الطيب ود ضحوية
وطه الضرير.
الطيب ودضحوية هو الطيب الحاج عبد القادر سليمان ود ضحوية
ينتسب إلى قبيلة الجعليين. أما طه الضرير يرجع نسبه إلى
قبيلة البطاحين.والقبيلتين تعتبر من قبائل البادية السودانية ذات
التاريخ التليد والأدب الشعبي العريض لذلك كثيراً ما كانوا يتخذون الهمبتة
كنشاط لكسب المال وفي نفس الوقت ضرباً من ضروب الفروسية.
الأخ الشفيع شكراً لفتح صفحة مثيرة من صفحات أدبنا الشعبي!!
دمت بود